ശബരിമല പതിനെട്ടാംപടിയിൽനിന്ന് പൊലീസുകാർ ഫോട്ടോ എടുത്തതിന് എസ്എപി ക്യാംപിലെ 23 പൊലീസുകാരെ നല്ലനടപ്പ് പരിശീലനത്തിന് അയയ്ക്കാനാണ് തീരുമാനം. കണ്ണൂർ കെഎപി - 4 ക്യാംപിൽ നല്ല നടപ്പ് പരിശീലനത്തിന് ഇവരെ അയയ്ക്കാൻ എഡിജിപി എസ്.ശ്രീജിത്ത് നിർദേശം നൽകി. പൊലീസുകാർക്കെതിരെ സ്വീകരിച്ച നടപടി നാളെ ഹൈക്കോടതിയെ അറിയിക്കും.നടപടിയെ തുടർന്ന് 23 പൊലീസുകാരും ശബരിമലയിൽനിന്ന് പരിശീലനത്തിനായി മടങ്ങി. തീവ്രപരിശീലനം നൽകണമെന്നാണ് എഡിജിപിയുടെ നിർദേശം. പതിനെട്ടാംപടിയിൽ പുറംതിരിഞ്ഞുനിന്നു പൊലീസുകാർ ഫോട്ടോ എടുത്തത് വിവാദമായിരുന്നു. ഫോട്ടോ സമൂഹ മാധ്യമങ്ങളിൽ പ്രചരിക്കുകയും ചെയ്‌തു. പന്തളം കൊട്ടാരം അടക്കം പൊലീസുകാർക്കെതിരെ രംഗത്തെത്തിയിരുന്നു.
