തായ്‌ലാൻഡിലെ രാജവാഴ്‌ചയുടെ ഭാവിയെക്കുറിച്ചും എഴുപത് പിന്നിട്ട മഹാ വജിരലോങ്കോൺ രാജാവിന്റെ പിൻഗാമിയെക്കുറിച്ചും വലിയ ചർച്ചകൾ രാജ്യത്ത് നടന്നുകൊണ്ടിരിക്കുന്നതിനിടെയാണ് പുതിയ സംഭവവികാസങ്ങൾ. ഒരിക്കൽ രാജകീയ പദവി നഷ്‌ടപ്പെട്ടതാണെങ്കിലും വചരേസോണിന്റെ നീക്കങ്ങൾ രാജകുടുംബത്തിലേക്കുള്ള തിരിച്ചുവരവിന്റെ സൂചനയാണെന്നാണ് വിലയിരുത്തൽ. ഒരുപക്ഷേ, വചരേസോൺ അടുത്ത കിരീടാവകാശി ആയേക്കും എന്ന തരത്തിലാണ് ചർച്ചകൾ പുരോഗമിക്കുന്നത്. തായ് സർക്കാരോ രാജകുടുംബമോ ഔദ്യോഗികമായി ഒന്നും പറഞ്ഞിട്ടില്ലെങ്കിലും, സാമൂഹികമാധ്യമങ്ങളിലും പൊതുവേദികളിലും ചർച്ചകൾ തുടരുകയാണ്. പൊതുചുമതലകൾ ഏറ്റെടുക്കും മുമ്പ് രാജകുടുംബാംഗങ്ങൾ ആശ്രമങ്ങളിൽ സമയം ചെലവഴിക്കുന്നത് പതിവാണെന്നതാണ് ഊഹാപോഹങ്ങൾ ശക്തമാക്കുന്നത്. അതിനാൽ തന്നെ രാജകീയ പിന്തുടർച്ചയെക്കുറിച്ചുള്ള ചർച്ചകളും ശക്തമാണ്.