ഓൺലൈൻ ഡെലിവറി ആപ്പുകൾ ഇന്ന് കൂടിക്കൂടി വരികയാണ്. പലരും ഇന്ന് പച്ചക്കറികളും ഗ്രോസറികളും എല്ലാം ഓൺലൈനിലാണ് വാങ്ങിക്കാറുള്ളത്. എന്തായാലും, ഈ ഓൺലൈൻ ഡെലിവറി ആപ്പുകളോട് പിടിച്ചുനിൽക്കുന്നതിന് ബെംഗളൂരുവിലെ തെരുവുകച്ചവടക്കാരൻ വച്ചിരിക്കുന്ന ഒരു ബോർഡാണ് ഇപ്പോൾ സോഷ്യൽ മീഡിയയിൽ വൈറലായിക്കൊണ്ടിരിക്കുന്നത്. അതിൽ, സെപ്റ്റോ, ബ്ലിങ്കിറ്റ്, ബിഗ് ബാസ്കറ്റ് (Zepto, Blinkit, and BigBasket) ഒക്കെ തേങ്ങയ്ക്ക് ഈടാക്കുന്ന വില എത്രയാണ് എന്നും താൻ എത്ര രൂപയ്ക്കാണ് തേങ്ങ വിൽക്കുന്നത് എന്നുമാണ് കുറിച്ചിരിക്കുന്നത്. സെപ്റ്റോയും ബ്ലിങ്കിറ്റും 80 രൂപയും ബിഗ് ബാസ്ക്കറ്റ് 70 രൂപയുമാണ് തേങ്ങയ്ക്ക് ഈടാക്കുന്നത്. എന്നാൽ, കച്ചവടക്കാരൻ പറയുന്നത് താൻ 55 രൂപയാണ് തേങ്ങയ്ക്ക് വാങ്ങുന്നത് എന്നാണ്. നിരവധിപ്പേരാണ് കച്ചവടക്കാരന്റെ ബുദ്ധിയെ പുകഴ്ത്തിക്കൊണ്ട് സോഷ്യൽ മീഡിയയിൽ കമന്റ് നൽകിയത്.
