രണ്ട് പതിറ്റാണ്ടിലേറെയായി അഭിനയലോകത്തുള്ള താരം ഇപ്പോഴിതാ ആക്ഷനിലും ഒരു കൈ നോക്കാൻ ഇറങ്ങുകയാണ്. ആഷിഖ് അബുവിന്‍റെ പുതിയ ചിത്രമായ ''റൈഫിള്‍ ക്ലബ്'' അണിയറപ്രവർത്തകർ സുരഭിയുടെ പിറന്നാള്‍ ദിനത്തിൽ പുറത്തുവിട്ടിരിക്കുന്ന ക്യാരക്ടർ പോസ്റ്റർ നിമിഷ നേരം കൊണ്ട് ഏവരുടേയും ശ്രദ്ധ കവർന്നിരിക്കുകയാണ്. തോക്കുമായി നിൽക്കുന്ന സൂസൻ എന്ന കഥാപാത്രത്തിന്‍റെ ലുക്കാണ് പോസ്റ്ററിലുള്ളത്.ഹാപ്പി ബർത്ത് ഡെ സൂസൻ എന്ന കുറിപ്പോടെയാണ് ആഷിഖ് അബു സോഷ്യൽമീഡിയയിൽ പോസ്റ്റർ പങ്കുവെച്ചിരിക്കുന്നത്. പ്രശസ്ത ബോളിവുഡ് സംവിധായകനും അഭിനേതാവുമായ അനുരാഗ് കശ്യപും നടൻ സുരേഷ് കൃഷ്ണയും ചിത്രത്തിൽ ശ്രദ്ധേയ വേഷങ്ങളിലുണ്ട്. ഇവർ അവതരിപ്പിക്കുന്ന കഥാപാത്രങ്ങളുടെ ക്യാരക്ടര്‍ പോസ്റ്ററുകൾ കഴിഞ്ഞ ദിവസം പുറത്തുവിട്ടിരുന്നു. ദയാനന്ദ് ബാരെ എന്ന കഥാപാത്രത്തെയാണ് അനുരാഗ് കശ്യപ് ചിത്രത്തില്‍ അവതരിപ്പിക്കുന്നത്. മലയാളത്തിലെ അദ്ദേഹത്തിന്‍റെ അരങ്ങേറ്റം കൂടിയാണ് ''റൈഫിള്‍ ക്ലബ്''. ഡോ. ലാസർ എന്ന കഥാപാത്രമായാണ് സുരേഷ് കൃഷ്ണ എത്തുന്നത്. ഒ.പി.എം സിനിമാസിന്‍റെ ബാനറിൽ ആഷിഖ് അബു, വിൻസന്‍റ് വടക്കൻ, വിശാൽ വിൻസന്‍റ് ടോണി എന്നിവർ ചേർന്ന് നിർമ്മിക്കുന്ന ചിത്രം വൈകാതെ റിലീസിനെത്തുമെന്നാണ് സൂചന. ദിലീഷ് പോത്തൻ, വാണി വിശ്വനാഥ്, എന്നിവരും പ്രധാന വേഷങ്ങളില്‍ ചിത്രത്തിലുണ്ട്.
