ഓസ്‌ട്രേലിയൻ ജോലി സ്വപ്നം കാണുന്ന ഇന്ത്യക്കാർക്ക് സന്തോഷം നൽകുന്ന വാർത്തയാണ് ഇപ്പോൾ പുറത്തുവരുന്നത്. ഇന്ത്യ-ഓസ്ട്രേലിയ ഇടക്കാല സ്വതന്ത്ര വ്യാപാര കരാറിന് കീഴിലുള്ള പ്രതിബദ്ധതയുടെ ഭാഗമായി ഓസ്ട്രേലിയ ഒക്‌ടോബർ 1 മുതൽ ഇന്ത്യൻ പൗരന്മാർക്ക് ഓരോ വർഷവും 1,000 വരെ തൊഴിൽ, അവധിക്കാല വിസകൾ വാഗ്ദാനം ചെയ്യും. ഓസ്‌ട്രേലിയയുടെ ഈ നീക്കത്തെ പ്രശംസിച്ച് വാണിജ്യ, വ്യവസായ മന്ത്രി പിയൂഷ് ഗോയൽ രംഗത്തെത്തി.ഈ നീക്കം ചലനാത്മകത സുഗമമാക്കുകയും ജനങ്ങളുമായുള്ള ബന്ധം കൂടുതൽ ആഴത്തിലാക്കുകയും ചെയ്യുമെന്ന് അദ്ദേഹം പറഞ്ഞു. 2022 ഡിസംബർ മുതൽ ഇന്ത്യ-ഓസ്ട്രേലിയ സാമ്പത്തിക സഹകരണവും വ്യാപാര കരാറും നിലവിൽ വന്നിരുന്നു. പുതിയ കരാറിലൂടെ ലഭിക്കുന്ന വിസ പദ്ധതിയിൽ 18 മുതൽ 30 വയസുള്ള ഇന്ത്യൻ പൗരന്മാർക്ക് ഓസ്‌ട്രേലിയയിലുടനീളം ജോലി ചെയ്യാനും പഠിക്കാനും യാത്ര ചെയ്യാനും ഒരു വർഷത്തെ വിസയ്ക്ക് അപേക്ഷിക്കാം.ഓരോ വർഷവും 1000 വിസകളാണ് ഓസ്ട്രേലിയ അനുവദിക്കുക. 12 മാസത്തെ കാലാവധിയുണ്ടാകും. എല്ലാ യോഗ്യതയുമുള്ള ഇന്ത്യക്കാർക്ക് മാത്രമാണ് ഈ വിസയ്ക്ക് അപേക്ഷിക്കാൻ സാധിക്കുകയുള്ളൂ. അതേസമയം, നിലവിലുള്ള വ്യാപാര കരാറിന്റെ വ്യാപ്തി ഒരു സമഗ്ര സാമ്പത്തിക സഹകരണ ഉടമ്പടിയിലേക്ക് വിപുലീകരിക്കാൻ ഇരു കക്ഷികളും ഇപ്പോൾ ചർച്ചകൾ നടത്തുന്നുണ്ട്. 2030ഓടെ 100 ബില്യൺ ഓസ്‌ട്രേലിയൻ ഡോളറിന്റെ ഉഭയകക്ഷി വ്യാപാരം കൈവരിക്കുക, ബഹുമുഖ, മറ്റ് പ്രാദേശിക ഫോറങ്ങളിൽ സഹകരണം വർദ്ധിപ്പിക്കുക എന്നീ ലക്ഷ്യങ്ങളും ഇരുപക്ഷവും ചർച്ച ചെയ്തിട്ടുണ്ട്.
