ഓടുന്ന ട്രെയിനിൽ ടിക്കറ്റിനെച്ചൊല്ലിയുണ്ടായ തർക്കത്തിന് പിന്നാലെ ടിടിഇ പുറത്തേക്ക് തള്ളിയിട്ട യുവതിക്ക് ദാരുണാന്ത്യം. ഉത്തർ പ്രദേശിലെ ഇടാവയിൽ ചൊവ്വാഴ്ച രാത്രിയാണ് സംഭവം. നാവികസേനാ ഉദ്യോഗസ്ഥനായ അജയ് സിങ്ങിന്റെ ഭാര്യ ആരതി യാദവാണ് മരിച്ചത്. ഇവരെ ട്രെയിനിൽനിന്ന് തള്ളി വീഴ്ത്തിയ ടിടിഇ സന്തോഷ് കുമാറിനെതിരേ ഇടാവ ജിആർപി, വ്യാഴാഴ്‌ച കേസ് രജിസ്റ്റർ ചെയ്തു.
ഡൽഹിയിലേക്ക് ചികിത്സാർഥം പുറപ്പെട്ടതായിരുന്നു ആരതി. എന്നാൽ, തിരക്കിനിടെ ടിക്കറ്റ് റിസർവ് ചെയ്ത ട്രെയിനിന് പകരം 04089 പട്‌ന-ആനന്ദ് വിഹാർ സ്പെഷൽ ട്രെയിനിൽ ഇവർ കയറുകയായിരുന്നു. പിന്നാലെയാണ് സന്തോഷ് കുമാറുമായി തർക്കമുണ്ടാകുന്നത്. സന്തോഷ് ആദ്യം ആരതിയുടെ പഴ്‌സ് ട്രെയിനിന് പുറത്തേക്ക് എറിയുകയും പിന്നാലെ അവരെ പുറത്തേക്ക് തള്ളുകയുമായിരുന്നെന്ന് ബന്ധുക്കൾ ആരോപിച്ചു. ആരതി തൽക്ഷണം മരിച്ചെന്നാണ് വിവരം.
