പൊലീസ് കസ്റ്റഡിയിൽ ക്രൂര മർദ്ദനത്തിന് ഇരയായ ദലിത് യുവാവ് ബെംഗളൂരുവിലെ സ്വകാര്യ പുനരധിവാസ കേന്ദ്രത്തിൽ ദുരൂഹ സാഹചര്യത്തിൽ മരിച്ചു. മദ്യത്തിന് അടിമയായ ദർശനെ നവംബർ 12 ന് വീടിനു സമീപം ഉണ്ടായ സംഘർഷത്തിന് ഒടുവിൽ വിവേക് നഗർ പൊലീസ് കസ്റ്റഡിയിലെടുത്തിരുന്നു. ആവർത്തിച്ച് ആവശ്യപ്പെട്ടിട്ടും പൊലീസ് അദ്ദേഹത്തെ വിട്ടയക്കുകയോ കാണാൻ അനുവദിക്കുകയോ ചെയ്‌തില്ലെന്ന് ദർശന്റെ അമ്മ ആദിലക്ഷ്മി പറയുന്നു.
അസിസ്റ്റന്റ് സബ് ഇൻസ്പെക്ടർ പവനും മറ്റ് രണ്ട് പൊലീസുകാരും ദർശനെ സ്റ്റേഷനിനുള്ളിൽ ക്രൂരമായി ആക്രമിച്ചതായും നടക്കാൻ പോലും കഴിയാത്ത അവസ്ഥയിലായതായും ആദിലക്ഷ്മി ആരോപിക്കുന്നു. പിന്നീട് നവംബർ 15 ന്, ദർശനെ പുനരധിവാസ കേന്ദ്രത്തിൽ പൊലീസ് നിർദേശപ്രകാരം പ്രവേശിപ്പിച്ചു. ദർശൻ സുഖം പ്രാപിക്കുന്നതായാണ് എല്ലാ ദിവസവും പുനരധിവാസ കേന്ദ്രത്തിൽ നിന്ന് കുടുംബത്തെ അറിയിച്ചിരുന്നത്.
നവംബർ 26 ന്, ശ്വാസ സംബന്ധമായ അസുഖം കാരണം ദർശൻ മരിച്ചെന്നാണ് പുനരധിവാസ കേന്ദ്രത്തിൽ നിന്നും അറിയിച്ചത്.കുടുംബാംഗങ്ങൾ അവിടേക്ക് എത്തിയപ്പോൾ മൃതദേഹം പുനരധിവാസ കേന്ദ്രത്തിൽ ഉണ്ടായിരുന്നില്ല. നെലമംഗല സർക്കാർ ആശുപത്രിയിലേക്ക് മൃതദേഹം മാറ്റുകയായിരുന്നു. മരിച്ച നിലയിലാണ് ദർശനെ ആശുപത്രിയിലേക്ക് കൊണ്ടുവന്നതെന്ന് ആശുപത്രി അധികൃതർ പറയുന്നു. നെഞ്ചിലും കാലുകളിലും ഒന്നിലധികം മുറിവുകൾ കണ്ടെത്തിയിരുന്നു. ബെംഗളൂരുവിലെ വിക്ടോറിയ ആശുപ്രതിയിൽ നടന്ന പോസ്റ്റ്മോർട്ടത്തിൽ ശരീരത്തിൽ നിരവധി പഴയ പരുക്കുകൾ ഉണ്ടായിരുന്നുവെന്നാണ് വിവരം.
