520 പോലീസ് സ്റ്റേഷനുകളിലാണ് ഒന്നാംഘട്ടത്തിൽ സിസിടിവികൾ സ്ഥാപിക്കാൻ തീരുമാനിച്ചത്. ഇതിൽ മാഞ്ഞൂർ, വൈത്തിരി പോലീസ് സ്റ്റേഷനുകൾ ഒഴികെയുള്ളവയിൽ സിസിടിവി സ്ഥാപിക്കൽ പൂർത്തിയതായി സ്റ്റാന്റിങ് കോൺസൽ സി.കെ. ശശി സുപ്രീം കോടതിയിൽ ഫയൽചെയ്ത റിപ്പോർട്ടിൽ വ്യക്തമാക്കിയിട്ടുണ്ട്. സിസിടിവി സ്ഥാപിക്കൽ പൂർത്തികരിച്ച പോലീസ് സ്റ്റേഷനുകളിൽ 483 എണ്ണം ക്രമസമാധാന പാലനത്തിനുള്ള സ്റ്റേഷനുകളാണ്.

13 എണ്ണം റയിൽവെ പോലീസ് സ്റ്റേഷനുകളും 10 എണ്ണം തീരദേശ പോലീസ് സ്റ്റേഷനുകളും 14 എണ്ണം വനിതാ പോലീസ് സ്റ്റേഷനുകളും ആണെന്നും സംസ്ഥാനസർക്കാർ സുപ്രീം കോടതിയെ അറിയിച്ചു. 20 സൈബർ പോലീസ് സ്റ്റേഷനുകൾ ഉൾപ്പടെ 28 പോലീസ് സ്റ്റേഷനുകളിൽക്കൂടി സിസിടിവി സ്ഥാപിക്കൽ പുരോഗമിക്കുകയാണെന്നും സംസ്ഥാന സർക്കാർ സുപ്രീം കോടതിയെ അറിയിച്ചു.

12 സിസിടിവികളാണ് ഓരോ സ്റ്റേഷനിലും സ്ഥാപിച്ചിരിക്കുന്നത്. ഇതിൽ ഇൻസ്പെക്ടറുടെയും സബ് ഇൻസ്പെക്ടറുടെയും മുറികൾ ഉൾപെടും. ലോക്കപ്പിന് മുന്നിലെ ഇടനാഴി, റിസപ്ഷൻ, പോലീസ് സ്റ്റേഷന്റെ പ്രവേശന കവാടം, പിൻഭാഗം എന്നിവയും ഉൾപ്പെടും. ഈ സിസിടിവികൾ രാത്രികാലങ്ങളിലും പ്രവർത്തിക്കുന്നവയാണ്. ശബ്ദം ഉൾപ്പടെ റെക്കോർഡ് ചെയ്യും. ദൃശ്യങ്ങളിൽ ക്രമക്കേട് നടത്തിയാൽ കണ്ടെത്താൻ കഴിയുമെന്നും കേരളം സുപ്രീം കോടതിയെ അറിയിച്ചു.ഓരോ സ്റ്റേഷനിലും എട്ട് ടിബിയുടെ 16 ഹാർഡ് ഡിസ്കുകളും അനുവദിച്ചിട്ടുണ്ട്. ഒന്നര വർഷത്തോളം ഡാറ്റ സൂക്ഷിക്കാനാകുമെന്നും സർക്കാർ സുപ്രീം കോടതിയെ അറിയിച്ചു.