Drisya TV | Malayalam News

പൈജാമയും സ്ലിപ്പറും ധരിച്ച് വിമാനങ്ങളിൽ കയറുന്നത് അവസാനിപ്പിക്കണമെന്ന് യുഎസ് ഗതാഗത സെക്രട്ടറി 

 Web Desk    25 Nov 2025

രാജ്യത്തുടനീളമുള്ള ആളുകളോട് പൈജാമയും സ്ലിപ്പറും ധരിച്ച് വിമാനങ്ങളിൽ കയറുന്നത് അവസാനിപ്പിക്കണമെന്ന് യുഎസ് ഗതാഗത സെക്രട്ടറി ഷോൺ ഡഫി അഭ്യർത്ഥിച്ചു. ഈ പ്രവണത നിയന്ത്രണാതീതമായിരിക്കുന്നുവെന്നും യാത്രക്കാർ വിമാനത്താവളത്തിലേക്ക് സ്ലിപ്പറുകളും പൈജാമയും ധരിക്കുന്നത് ഒഴിവാക്കണമെന്ന് അദ്ദേഹം പറഞ്ഞു. നമ്മുടെ പെരുമാറ്റത്തിലും വസ്ത്രധാരണത്തിലും മര്യാദ പുനഃസ്ഥാപിക്കേണ്ട സമയമാണിതെന്ന് ഡഫി ചൂണ്ടിക്കാട്ടി.

യുഎസിൽ താങ്ക്സ്ഗിവിംഗ് യാത്രാ സീസൺ ആരംഭിക്കുന്നതിന് മുന്നോടിയായാണ് വിമാന യാത്രാ പെരുമാറ്റവും വസ്ത്രധാരണവും സംബന്ധിച്ച് ഗതാഗത സെക്രട്ടറി ഷോൺ ഡഫി കർശനമായ അഭ്യർഥന പുറപ്പെടുവിച്ചത്.

വിമാനയാത്രയിൽ മര്യാദയുടെ അഭാവം വർദ്ധിച്ചുവരുന്നതായി തിങ്കളാഴ്ച നടന്ന ഒരു പത്രസമ്മേളനത്തിൽ ഷോൺ ഡഫി പറഞ്ഞു. വിമാനയാത്രയ്ക്കിടെ ഷൂസ് ഊരിവെച്ച് സീറ്റിൽ നഗ്നപാദം വയ്ക്കുന്ന യാത്രക്കാരോട് അദ്ദേഹം അതൃപ്തി പ്രകടിപ്പിച്ചതായി ന്യൂയോർക്ക് ടൈംസ് റിപ്പോർട്ട് ചെയ്തു.

"ദയവായി ചെരിപ്പും പൈജാമയും ധരിച്ച് വിമാനത്താവളത്തിലേക്ക് വരരുത്. അല്പം മര്യാദ പുനഃസ്ഥാപിക്കേണ്ടതുണ്ട്" എന്ന് അദ്ദേഹം പറഞ്ഞു. ശാരീരികമായി ശക്തരായവർ മറ്റുള്ളവരെ അവരുടെ ലഗേജ് കൊണ്ടുപോകാൻ സഹായിക്കണമെന്നും ഡഫി പറഞ്ഞു. ആളുകൾ അവരുടെ മനുഷ്യത്വം പ്രകടിപ്പിക്കണമെന്ന് അദ്ദേഹം ആവശ്യപ്പെട്ടു.

  • Share This Article
Drisya TV | Malayalam News