വിദ്യാഭ്യാസ അവകാശ നിയമപ്രകാരം സ്കൂളുകൾ ഇല്ലാത്ത സ്ഥലങ്ങളിൽ സ്കൂളുകൾ സ്ഥാപിക്കണമെന്ന് കേരളത്തിന് നിർദേശം നൽകി സുപ്രീം കോടതി. ഒരു കിലോമീറ്റർ ചുറ്റളവിൽ എൽപി സ്കൂളുകൾ ഇല്ലെങ്കിൽ അവിടെ എൽപി സ്കൂളുകൾ സ്ഥാപിക്കണം. മൂന്ന് കിലോമീറ്റർ ചുറ്റളവിൽ അപ്പർ പ്രൈമറി സ്കൂളുകൾ ഇല്ലെങ്കിൽ അവിടെ യുപി സ്കൂളുകൾ സ്ഥാപിക്കണമെന്നും സംസ്ഥാന സർക്കാരിന് സുപ്രീം കോടതി നിർദേശംനൽകി. എളാമ്പ്രയിൽ സർക്കാർ എൽപി സ്കൂൾ ആരംഭിക്കണമെന്ന മഞ്ചേരി മുൻസിപ്പാലിറ്റിയുടെ ആവശ്യം സംബന്ധിച്ച ഹർജിയിലായിരുന്നു സുപ്രീം കോടതിയുടെ ഉത്തരവ്.
സ്വന്തം കെട്ടിടം ഇല്ലെങ്കിൽ വാടകയ്ക്ക് കെട്ടിടമെടുത്ത് സ്കൂളുകൾ സ്ഥാപിക്കണം. സ്ഥിരം അധ്യാപകർ ഇല്ലെങ്കിൽ കരാർ അടിസ്ഥാനത്തിൽ അധ്യാപകരെ നിയമിക്കണം. ഇതിനായി വിരമിച്ച അധ്യാപകരുടെ സേവനം ഉപയോഗിക്കാമെന്നും സുപ്രീം കോടതി വ്യക്തമാക്കി. എയ്‌ഡഡ് മേഖലയ്ക്ക് ഈ ഉത്തരവ് ബാധകമാകില്ലെന്നും സുപ്രീം കോടതി വ്യക്തത വരുത്തി. മനോഹരമായ പേരുകളുമായി വരുന്ന ട്രസ്റ്റുകൾക്കും ഉത്തരവ് ബാധകമല്ലെന്ന് ചീഫ് ജസ്റ്റിസ് അറിയിച്ചു. പുതുതായി തുടങ്ങുന്ന സ്കൂകൂളുകളിൽ വിദ്യാർഥി പ്രവേശനവും അധ്യാപക നിയമനവും സുതാര്യമായിരിക്കണമെന്ന് കോടതി നിർദേശിച്ചു.
