ഗുരുദ്വാരയിൽ കയറാൻ വിസമ്മതിച്ച ക്രിസ്‌ത്യൻ കരസേനാ ഉദ്യോഗസ്ഥനെ പിരിച്ചുവിട്ട സൈന്യത്തിന്റെ നടപടി ശരിവെച്ച് സുപ്രീം കോടതി. പിരിച്ചുവിട്ട നടപടിക്കെതിരേ ഉദ്യോഗസ്ഥൻ നൽകിയ ഹർജി പരിഗണിക്കവെ ഇയാൾക്കെതിരേ രൂക്ഷ വിമർശനമാണ് കോടതി നടത്തിയത്.
സഹപ്രവർത്തകരായ സിഖ് സൈനികരുടെ വിശ്വാസത്തെ ബഹുമാനിക്കാൻ ശ്രമിക്കാത്ത ഉദ്യോഗസ്ഥനെ ‘മോശം സ്വഭാവമുള്ളയാളെ'ന്ന് വിശേഷിപ്പിച്ച കോടതി ഇയാൾ സൈനികനാകാൻ യോഗ്യനല്ലെന്നും തുറന്നടിച്ചു. 2021-ൽ സൈന്യത്തിൽ നിന്ന് പിരിച്ചുവിട്ട നടപടിക്കെതിരേ സാമുവൽ കമലേശൻ എന്ന മുൻ ഉദ്യോഗസ്ഥനാണ് കോടതിയെ സമീപിച്ചത്. ചീഫ് ജസ്റ്റിസ് സൂര്യകാന്തും ജസ്റ്റിസ് ജോയ്മമല്യ ബാഗ്‌ചിയും ഉൾപ്പെട്ട ബെഞ്ചാണ് കേസ് പരിഗണിച്ചത്.
സൈന്യം ഒരു മതേതര സ്ഥാപനമാണെന്നും അതിന്റെ അച്ചടക്കത്തിൽ വിട്ടുവീഴ്‌ച ചെയ്യാൻ കഴിയില്ലെന്നും കോടതി നിരീക്ഷിച്ചു. മികച്ച അച്ചടക്കം പാലിക്കേണ്ട സൈനിക ഉദ്യോഗസ്ഥൻ ഇതിലൂടെ മുന്നോട്ട് വയ്ക്കുന്ന സന്ദേശം എന്താണ്. ഇയാളെ പുറത്താക്കേണ്ടത് തന്നെയാണ്. ഇത്തരം മോശം സ്വഭാവമുള്ളവരെ സൈന്യത്തിന് ആവശ്യമില്ലെന്നും കോടതി വ്യക്തമാക്കി.
2021-ൽ അച്ചടക്കലംഘനം ചൂണ്ടിക്കാട്ടിയാണ് ലഫ്റ്റനൻ്റായിരുന്ന സാമുവൽ കമലേശനെ പെൻഷനും ഗ്രാറ്റുവിറ്റിയും ഇല്ലാതെ ഇന്ത്യൻ സൈന്യത്തിൽനിന്ന് പിരിച്ചുവിട്ടത്. ഗുരുദ്വാരയിൽ പൂജയ്ക്കായി എത്താനുള്ള കമാൻഡിങ് ഓഫീസറുടെ നിർദേശം ഇയാൾ നിരസിക്കുകയായിരുന്നു. ഗുരുദ്വാരയിൽ പൂജ ചെയ്യുന്നത് തന്റെ ക്രിസ്‌തീയ വിശ്വാസങ്ങളെ ബാധിക്കുമെന്ന് ചൂണ്ടിക്കാട്ടിയായിരുന്നു ഇത്.
പിരിച്ചുവിട്ട നടപടിക്കെതിരേ കമലേശൻ ആദ്യം ഡൽഹി ഹൈക്കോടതിയെയാണ് സമീപിച്ചത്. മേയ് മാസത്തിൽ ഹർജി പരിഗണിച്ച ഡൽഹി ഹൈക്കോടതി ഇയാൾക്കെതിരായി സൈന്യം സ്വീകരിച്ച നടപടി ശരിവെച്ചിരുന്നു. ഈ വിധിക്കെതിരെയാണ് പിന്നീട് കമലേശൻ സുപ്രീം കോടതിയെ സമീപിച്ചത്.
