രാജ്യത്തെ പൗരത്വനിയമം ഭേദഗതി വരുത്താനൊരുങ്ങി കാനഡ. വിദേശത്ത് ജനിക്കുകയോ ദത്തെടുക്കുകയോ ചെയ്ത കുട്ടികൾക്കും ആയിരക്കണക്കിന് ഇന്ത്യൻ വംശജരായ കുടുംബങ്ങൾക്കും ഗുണകരമാകുന്നതാണ് പുതിയ ബിൽ. പൗരത്വ നിയമം (2025) ഭേദഗതി ചെയ്യുന്നതിനുള്ള ബിൽ സി-3 കഴിഞ്ഞ ബുധനാഴ്ച സെനറ്റിൽ പാസാക്കി. നിയമം പ്രാബല്യത്തിൽ വരുന്നതോടെ രാജ്യത്തെ പൗരത്വനിയമം കൂടുതൽ ലളിതമാകും.
കാനഡയുടെ പൗരത്വ നിയമങ്ങളിലെ ദീർഘകാലമായുള്ള പ്രശ്‌നങ്ങൾ പരിഹരിക്കാൻ ഉദ്ദേശിച്ചുള്ളതാണ് ബില്ലെന്ന് കാനഡയുടെ ഇമിഗ്രേഷൻ മന്ത്രി ലെന മെല്ലെജ് ഡയബ് പറഞ്ഞു. വിദേശത്ത് ജനിക്കുകയോ ദത്തെടുക്കുകയോ ചെയ്ത കുട്ടികളുള്ള കുടുംബങ്ങൾക്കും നീതി ഉറപ്പാക്കുന്നതാണ് ബിൽ. മുൻകാല നിയമങ്ങളാൽ ഒഴിവാക്കപ്പെട്ട ആളുകൾക്ക് ഇത് പൗരത്വം നൽകും. ഈ മാറ്റങ്ങൾ കനേഡിയൻ പൗരത്വത്തെ ശക്തിപ്പെടുത്തുകയും സംരക്ഷിക്കുകയും ചെയ്യുമെന്നും ഡയബ് പ്രസ്‌താവനയിൽ അറിയിച്ചു.
പുതിയ നിയമപ്രകാരം കുട്ടിക്ക് പൗരത്വം ലഭിക്കാൻ, കുട്ടിയുടെ ജനനത്തിനോ ദത്തെടുക്കലിനോ മുൻപ് മാതാപിതാക്കൾ കാനഡയിൽ മൊത്തത്തിൽ മൂന്ന് വർഷം തമാസിച്ചാൽ മതി. ആദ്യ തലമുറയ്ക്കപ്പുറം വിദേശത്ത് ജനിച്ചവർക്കും ഇത്തരത്തിൽ കനേഡിയൻ പൗരത്വം കൈമാറാമെന്നും ബിൽ സി-3 നിർദേശിക്കുന്നു. കുട്ടിയുടെ ജനനത്തിനോ ദത്തെടുക്കലിനോ മുൻപായി 1,095 ദിവസം (മൂന്ന് വർഷം) കാനഡയിൽ താമസിച്ചിരുന്നതായി രക്ഷിതാവ് തെളിയിക്കണം. ഇത് തുടർച്ചയായ 1,095 ദിവസമല്ലെന്നും പലപ്പോഴായി കാനഡയിൽ അത്രയും ദിവസം താമസിച്ചാൽ മതിയെന്നുമാണ് നിയമവിദഗ്ധർ വ്യക്തമാക്കുന്നത്.
