തേജസ് തകർന്നു വീണ സംഭവത്തിൽ വ്യോമസേന അന്വേഷണം തുടങ്ങി. അതിന്റെ ഭാഗമായി ദുബായ് ഏവിയേഷൻ അതോറിറ്റിയുമായി ചർച്ചകൾ നടത്തി. വിമാനത്തിന്റെ ബ്ലാക് ബോക്സ‌ിനായി തിരച്ചിൽ ആരംഭിച്ചിട്ടുണ്ട്.

അപകടമുണ്ടായപ്പോൾ പൈലറ്റിന് ഇജക്ട് ചെയ്ത് രക്ഷപ്പെടാൻ കഴിയാത്തത് എന്തുകൊണ്ടാണെന്നു പരിശോധിക്കും. കഴിഞ്ഞ കൊല്ലം മാർച്ചിൽ ജയ്‌സൽമേറിൽ അപകടമുണ്ടായിരുന്നെങ്കിലും പൈലറ്റ് ഇജക്ട് ചെയ്തു രക്ഷപ്പെട്ടിരുന്നു.

തദ്ദേശീയ തേജസ് എംകെ1 യുദ്ധവിമാനങ്ങളുടെ ചരിത്രത്തിലെ രണ്ടാമത്തെ അപകടമാണ് ദുബായിൽ ഉണ്ടായത്. ദുബായ് എയർ ഷോയുടെ അവസാന ദിനം ഇന്ത്യൻ വ്യോമസേനയുടെ സൂര്യ കിരൺ സംഘവും തേജസുമാണു വ്യോമാഭ്യാസ പ്രകടനം നടത്തിയത്. സൂര്യകിരൺ സംഘത്തിന്റെ പിന്നാലെയായിരുന്നു തേജസിന്റെ പ്രകടനം. വിമാനം നിലംപതിച്ചതോടെ രക്ഷാപ്രവർത്തകർ അതിവേഗം അപകട സ്‌ഥലത്തെത്തി വിമാനത്തിലെ തീ അണച്ചു. ഏകദേശം രണ്ടു മണിക്കൂറിനുശേഷം എയർ ഷോ വീണ്ടും തുടങ്ങി.

കഴിഞ്ഞ വർഷം മാർച്ച് 12നു രാജസ്ഥാനിലെ ജയ്‌സൽമേറിൽ നടന്ന സൈനിക അഭ്യാസപ്രകടനത്തിനിടെയാണ് തേജസ് തകർന്നത്. വിമാനത്തിന്റെ ഓയിൽ പമ്പിലെ തകരാറിനാൽ എൻജിൻ പ്രവർത്തനം തടസപ്പെട്ടതാണ് അപകട കാരണമെന്നാണ് കരുതപ്പെടുന്നത്. ഒറ്റ എൻജിനുള്ള വിമാനമാണു തേജസ്.