ലോകമെമ്പാടും നടക്കുന്ന ലക്ഷക്കണക്കിന് തട്ടിപ്പുകൾക്ക് ഉത്തരവാദികൾ ഇവരാണെന്നാണ് ആരോപണം.സബ്സ്ക്രിപ്ഷൻ അടിസ്ഥാനമാക്കിയുള്ള ഫിഷിങ് സോഫ്റ്റ്വെയർ ലൈറ്റ്ഹൗസ് നെറ്റ്വർക്ക് നൽകുന്നു എന്നാണ് ഗൂഗിളിന്റെ ആരോപണം. ആഴ്‌ച, മാസം, വർഷം അല്ലെങ്കിൽ ലൈഫ് ടൈം പ്ലാനുകളിൽ ഇവ ലഭ്യമാണ്. ഇതിൽ നൂറുകണക്കിന് വ്യാജ വെബ്സൈറ്റ് ടെംപ്ലേറ്റുകൾ, ഡൊമെയ്ൻ സജ്ജീകരണ ടൂളുകൾ, യഥാർത്ഥ പ്ലാറ്റ്ഫോമുകളെ അനുകരിക്കുന്ന പേയ്മെന്റ്റ് ഫീച്ചറുകൾ എന്നിവ ഉൾപ്പെടുന്നു. ഈ കിറ്റുകൾ ടെലിഗ്രാം ചാനലുകൾ വഴി വിപണനം ചെയ്യുന്നു. ഗൂഗിൾ ഇവ കണ്ടെത്തി അക്കൗണ്ടുകൾ സസ്പെൻഡ് ചെയ്യുന്നതുവരെ യൂട്യൂബും ഇവ പ്രൊമോട്ട് ചെയ്തിരുന്നു.

ലൈറ്റ്ഹൗസ് നെറ്റ്വർക്ക് 121 രാജ്യങ്ങളിലായി ലക്ഷക്കണക്കിന് പേരെ വഞ്ചിച്ചിട്ടുണ്ടെന്നും ആഗോളതലത്തിൽ 1 ബില്യൺ (100 കോടി) ഡോളറിലധികം നഷ്ട‌ം വരുത്തിയിട്ടുണ്ടെന്നും ഡിപ്പാർട്ട്മെന്റ് ഓഫ് ഹോംലാൻഡ് സെക്യൂരിറ്റിയുടെ കണക്ക് ഉദ്ധദ്ധരിച്ച് ഗൂഗിൾ വിശദീകരിക്കുന്നു.തട്ടിപ്പുകൾ തടയാനും, നഷ്‌ടപ്പെട്ട തുക വീണ്ടെടുക്കാനും, ഉപയോക്താക്കളെ കൂടുതൽ തട്ടിപ്പുകളിൽനിന്ന് സംരക്ഷിക്കാനുമായി ഒരു നിരോധന ഉത്തരവ് ആണ് ഗൂഗിൾ ആവശ്യപ്പെടുന്നത്. ലൈറ്റ്ഹൗസ് പോലെയുള്ളവ ഗൂഗിളിലുള്ള പൊതുജനവിശ്വാസത്തെയാണ് ചൂഷണം ചെയ്യുന്നതെന്ന് കമ്പനി ചൂണ്ടിക്കാട്ടുന്നു.