ജീവനക്കാർ സമരത്തിൽ പങ്കെടുക്കാതിരിക്കാനുള്ള നടപടികൾ സ്വീകരിക്കണമെന്ന് കേന്ദ്രം ബാങ്കുകൾക്ക് നിർദേശം നൽകിയതായാണ് വിവരം. ജോലി തടസ്സപ്പെടുത്താൻ ശ്രമിക്കുന്നവർക്കെതിരെ എഫ്ഐആർ ഇടാന‌ും‌ കേന്ദ്രം നിർദേശം‌ നൽകിയതായി ജീവനക്കാരുടെ‌ യൂണിയനുകൾ പറഞ്ഞു. ഈ മാസം 30ന് ബാങ്കുകളുടെ അർധവാർഷിക കണക്കെടുപ്പ് നടക്കുന്നതിനാൽ പണിമുടക്ക് ബാങ്കിങ് ഇടപാടുകളെ കാര്യമായ തോതിൽ ബാധിക്കുമെന്നും കേന്ദ്രം വിലയിരുത്തി.

ബാങ്കുകളുടെ പ്രവൃത്തിദിനം 5 ദിവസമാക്കുക, വിവേചനപരമായ ഇൻസെന്റീവ് സ്കീം പിൻവലിക്കുക എന്നീ പ്രധാന ആവശ്യങ്ങൾ ഉന്നയിച്ചാണ് 28,29,30 തീയതികളിൽ (തിങ്കൾ, ചൊവ്വ, ബുധൻ) പണിമുടക്ക്. തൊട്ടുമുൻപുള്ള ശനിയും ഞായറുമടക്കം 5 ദിവസം തുടർച്ചയായി ബാങ്കുകൾ അടഞ്ഞുകിടക്കാനാണ് സാധ്യത. സമരത്തിനു മുന്നോടിയായി ഇൻസെന്റീവ് സ്കീം തൽക്കാലം മരവിപ്പിച്ചിരുന്നു. എന്നാൽ പ്രവൃത്തിദിനം സംബന്ധിച്ച് തീരുമാനമെടുത്തിട്ടില്ല.