ഇ.ഡി നിലവിൽ നടത്തുന്ന അന്വേഷണം തങ്ങളുടെ അധികാര പരിധി മറികടന്നുള്ളതാണെന്നാണ് സിഎംആർഎൽ കോടതിയിൽ പ്രധാനമായും വാദിക്കുന്നത്. കൃത്യമായ ഒരു എഫ്ഐആറോ അല്ലെങ്കിൽ ഔദ്യോഗിക പരാതിയോ ഇല്ലാതെയാണ് കേന്ദ്ര ഏജൻസി തങ്ങൾക്കെതിരെ കള്ളപ്പണം വെളുപ്പിക്കൽ നിരോധന നിയമപ്രകാരം അന്വേഷണവുമായി മുന്നോട്ട് പോകുന്നതെന്നും കമ്പനി വാദിച്ചു. മുൻ മുഖ്യമന്ത്രി പിണറായി വിജയന്റെ മകൾ ടി.വീണയുടെ ഉടമസ്ഥതയിലുള്ള എക്സാലോജിക് സൊല്യൂഷൻസിന് സിഎംആർഎൽ നൽകിയ തുകയുമായി ബന്ധപ്പെട്ട് സമൻസ് അയക്കാൻ ഇ.ഡിക്ക് നിയമപരമായ അധികാരമില്ലെന്നാണ് കമ്പനിയുടെ വാദം.

സിഎംആർഎല്ലിന്റെ അപ്പീലിലെ ആവശ്യം ഇ.ഡി അന്വേഷണം അടിയന്തരമായി സ്റ്റേ ചെയ്യണമെന്നായിരുന്നു. എന്നാൽ ഇടക്കാല ഉത്തരവ് സാധ്യമല്ലെന്ന് ജസ്റ്റിസ് എ.രാജാ വിജയരാഘവൻ, കെ.വി.ജയകുമാർ എന്നിവരുടെ ബെഞ്ച് വ്യക്തമാക്കി. കക്ഷികൾ രണ്ടുകൂട്ടരും പൂർണമായ വാദത്തിന് തയാറാണെങ്കിൽ അപ്പീൽ ഹർജി ഇന്നു തന്നെ കേട്ട് തീർപ്പാക്കാമെന്നും കോടതി വ്യക്തമാക്കി. നേരത്തെ, ഇ.ഡി നൽകിയ സമൻസിനെതിരെ സിഎംആർഎൽ നൽകിയ ഹർജി സിംഗിൾ ബെഞ്ച് തള്ളിയിരുന്നു. ഇ.ഡി അന്വേഷണം ആദ്യഘട്ടത്തിൽ മാത്രമാണെന്നും സമൻസ് നടപടികളിൽ കോടതിക്ക് ഇപ്പോൾ ഇടപെടാനാകില്ലെന്നുമായിരുന്നു സിംഗിൾ ബെഞ്ചിന്റെ നിരീക്ഷണം. ഇതിനെതിരെയാണ് സിഎംആർഎൽ ഡിവിഷൻ ബെഞ്ചിനെ സമീപിച്ചത്. സിഎംആർഎല്ലുമായി ബന്ധപ്പെട്ട സ്ഥാപനങ്ങളിലും വീണയുമായി ബന്ധപ്പെട്ട വീടുകളിലും കഴിഞ്ഞ ദിവസങ്ങളിൽ ഇ.ഡി വിപുലമായ പരിശോധനകൾ നടത്തുകയും അക്കൗണ്ടുകൾ മരവിപ്പിക്കുകയും ചെയ്തിരുന്നു.