ബജറ്റ് ഉപഭോക്താക്കളെ ലക്ഷ്യമിട്ട് ഐഫോൺ 17 സീരീസിലേക്ക് ഏറ്റവും പുതിയ അംഗമായി 'ഐഫോൺ 17e എന്ന മോഡൽ ആപ്പിൾ(Apple iPhone 17e)പുറത്തിറക്കി. മുൻഗാമിയായ ഐഫോൺ 16e-യിൽ നിന്ന് ഏറെ വ്യത്യസ്തവും കരുത്തുറ്റതുമായ ഫീച്ചറുകളുമായാണ് വിപണിയിൽ എത്തുന്നത്. മികച്ച പ്രകടനവും കൂടുതൽ സ്റ്റോറേജ് സൗകര്യവും കുറഞ്ഞ വിലയിൽ ആഗ്രഹിക്കുന്നവർക്ക് ഈ ഐഫോൺ മികച്ച ചോയ്സ് ആയിരിക്കും.
ഏറ്റവും പുതിയ ആപ്പിൾ A19 ബയോണിക് ചിപ്പാണ് ഐഫോൺ 17e-യുടെ ഹൃദയം. 3-നാനോമീറ്റർ സാങ്കേതികവിദ്യയിൽ നിർമ്മിച്ച ഈ ചിപ്പ് മികച്ച പെർഫോമൻസും ഊർജ്ജക്ഷമതയും നൽകുന്നു. മുൻ മോഡലിനേക്കാൾ വേഗതയേറിയ പ്രകടനവും ഉയർന്ന തലത്തിലുള്ള ഗെയിമിംഗും ഇത് ഉറപ്പാക്കുന്നു.
ഐഫോൺ 17e-യുടെ ഏറ്റവും വലിയ ആകർഷണം അതിന്റെ ബേസ് സ്റ്റോറേജാണ്. 128GB-ക്ക് പകരം 256GB സ്റ്റോറേജാണ് ബേസ് മോഡലിൽ ലഭിക്കുന്നത്. ഇത് ഫോട്ടോകളും വീഡിയോകളും സൂക്ഷിക്കാൻ കൂടുതൽ സ്ഥലം നൽകുന്നു. കൂടാതെ, 512GB വേരിയന്റും ലഭ്യമാണ്. 'e' സീരീസിൽ ആദ്യമായി മാഗ്സേഫ് വയർലെസ് ചാർജിംഗ് സൗകര്യം ഉൾപ്പെടുത്തിയിരിക്കുന്നു. ഇത് 15W വരെയുള്ള വേഗതയിൽ സുരക്ഷിതമായി ചാർജ് ചെയ്യാനും വിവിധ മാഗ്നെറ്റിക് ആക്സസറികൾ ഉപയോഗിക്കാനും സഹായിക്കുന്നു.48 മെഗാപിക്സൽ ഫ്യൂഷൻ മെയിൻ ക്യാമറയാണ് ഫോണിലുള്ളത്. മികച്ച ഫോട്ടോകൾക്കും 4K ഡോൾബി വിഷൻ വീഡിയോകൾക്കും ഇത് സഹായിക്കുന്നു. കൂടാതെ, 2x ഒപ്റ്റിക്കൽ ക്വാളിറ്റി സൂം സൗകര്യവും ലഭ്യമാണ്.
6.1 ഇഞ്ച് സൂപ്പർ റെറ്റിന XDR OLED ഡിസ്പ്ലേയാണ് ഫോണിലുള്ളത്. കൂടുതൽ സുരക്ഷയ്ക്കായി സെറാമിക് ഷീൽഡ് 2 (Ceramic Shield 2) ഇതിൽ ഉപയോഗിച്ചിരിക്കുന്നു. ഇത് പഴയതിനേക്കാൾ മൂന്നിരട്ടി സ്ക്രാച്ച് റെസിസ്റ്റൻസ് നൽകുന്നു.
ഇന്ത്യയിൽ ഐഫോൺ 17e-യുടെ 256GB മോഡലിന് 64,900 രൂപയാണ് വില. 512GB മോഡലിന് 84,900 രൂപയും ചെലവാകും. ബ്ലാക്ക്, വൈറ്റ്, സോഫ്റ്റ് പിങ്ക് എന്നീ മൂന്ന് നിറങ്ങളിൽ ഫോൺ ലഭ്യമാണ്. മാർച്ച് 4 മുതൽ പ്രീ-ഓർഡറുകൾ ആരംഭിക്കും, മാർച്ച് 11 മുതൽ ഫോൺ വിപണിയിൽ ലഭ്യമാകും.
