എന്തു ചെയ്താലും നാട്ടുകാർക്ക് ഉപദ്രവമുണ്ടാക്കില്ലെന്ന് ഉദ്ഘാടന ശേഷം ശ്രീധരൻ പറഞ്ഞു. നാട്ടുകാർക്ക് ബുദ്ധിമുട്ടുണ്ടെങ്കിൽ പ്രതിവിധി കാണണമെന്ന് ജീവനക്കാരോടു പറയും. വേഗം പണി തീർക്കാനുള്ള സൗകര്യമൊരുക്കും. ഫീൽഡ് വർക്ക് ജൂൺ 1 ആകുമ്പോഴേക്കും തീർക്കും. അപ്പോഴേക്കും മഴ തുടങ്ങും. ഏപ്രിൽ അവസാനത്തോടെ ഫീൽഡ് വർക്ക് ആരംഭിക്കും. അതിനുള്ള ഏജൻസിയെ തീരുമാനിക്കുമെന്നും ശ്രീധരൻ പറഞ്ഞു. 

സ്റ്റേഷനുകളായി നിശ്ചയിച്ച സ്ഥലങ്ങളിൽ പരിശോധനകൾ നടത്തും. ശേഷമായിരിക്കും സർവേ നടപടികൾ. നാട്ടുകാരെ ബോധ്യപ്പെടുത്തിയാകും ഈ നടപടികൾ. തുടർന്നാകും ഭൂമി ഏറ്റെടുക്കൽ നടപടികൾ. പദ്ധതി സംബന്ധിച്ച് ഔദ്യോഗിക അറിയിപ്പ് വരുന്നതിനു കാലതാമസം എടുക്കുന്നത് കൊണ്ടാണ് തങ്ങൾ നേരത്തെ ഇതിനായുള്ള ഒരുക്കങ്ങൾ തുടങ്ങുന്നതെന്നും ശ്രീധരൻ പറഞ്ഞു. സംസ്ഥാനത്തെ മൂന്ന് വിമാനത്താവളങ്ങളെ ബന്ധിപ്പിച്ച് തിരുവനന്തപുരം-കണ്ണൂർ അർധ അതിവേഗ റെയിൽപ്പാതയാണ് ശ്രീധരൻ മുന്നോട്ട് വയ്ക്കുന്നത്.