അടുത്ത 12 മാസത്തിനുള്ളിൽ 50 ലക്ഷത്തിലധികം പേയ്മെന്റ് ഉപകരണങ്ങളും കമ്പനി വിന്യസിക്കും. സ്‍മാർട്ട് സ്പീക്കറുകളും പോയിന്റ് ഓഫ് സെയിൽ ഉപകരണങ്ങളും ഉൾപ്പെടുന്നതാണ് ഈ ശൃംഖല. ഇതിൽ ഏകദേശം 50 ശതമാനം ഉപകരണങ്ങളും ഗ്രാമീണ മേഖലകളിലായിരിക്കും സ്ഥാപിക്കുക. ടയർ 6 നഗരങ്ങളിലേക്കും ഗ്രാമപ്രദേശങ്ങളിലേക്കും ഡിജിറ്റൽ പേയ്മെന്റ് സൗകര്യം കൂടുതൽ ആഴത്തിൽ എത്തിക്കുകയാണ് ലക്ഷ്യം.

അടുത്തിടെ പ്രഖ്യാപിച്ച എംഡിആർ സംവിധാനമാണ് വ്യാപാരി ശൃംഖല വിപുലീകരണത്തിൽ ദീർഘകാല നിക്ഷേപം നടത്താൻ കമ്പനിക്ക് കൂടുതൽ അവസരം നൽകുന്നതെന്ന് ഫോൺപേ വ്യക്തമാക്കി. ചെറുകിട വ്യാപാരികളുടെ ഡിജിറ്റൽ പേയ്മെന്റ് വ്യാപനം പ്രോത്സാഹിപ്പിക്കുന്നതിനായി എംഡിആർ വഴി ലഭിക്കുന്ന തുകയുടെ അഞ്ച് ശതമാനം ഉപയോഗിച്ച് പ്രത്യേക ഫണ്ട് രൂപീകരിക്കാനുള്ള നീക്കവും ഈ നിക്ഷേപങ്ങൾക്ക് കൂടുതൽ ആക്കം നൽകുമെന്നാണ് കമ്പനിയുടെ വിലയിരുത്തൽ. പ്രത്യേകിച്ച് ടയർ 6 നഗരങ്ങളും ഗ്രാമങ്ങളും ഉൾപ്പെടെയുള്ള ആഴത്തിലുള്ള ഗ്രാമീണ മേഖലകളിലേക്കുള്ള ഡിജിറ്റൽ പേയ്മെന്റ് വ്യാപനത്തിനാണ് ഇതിലൂടെ കൂടുതൽ ശ്രദ്ധ നൽകുക.

കൂടുതൽ വലിയ മുൻനിര ജീവനക്കാരുടെ ശൃംഖല വഴി ചെറുപട്ടണങ്ങളിലെയും ഗ്രാമങ്ങളിലെയും വ്യാപാരികളിലേക്ക് നേരിട്ട് എത്താനാണ് ഫോൺപേ ലക്ഷ്യമിടുന്നത്. വ്യാപാരികളെ ഡിജിറ്റൽ പേയ്മെന്റ് സംവിധാനത്തിലേക്ക് കൊണ്ടുവരുന്നതിനൊപ്പം ഉപഭോക്തൃ തിരിച്ചറിയൽ നടപടിയായ കെവൈസി പൂർത്തിയാക്കുക, പേയ്മെന്റ് ഉപകരണങ്ങൾ സ്ഥാപിക്കുക, തുടർച്ചയായ വ്യാപാരി പിന്തുണ നൽകുക തുടങ്ങിയ സേവനങ്ങളും ഈ ജീവനക്കാർ നിർവഹിക്കും.

പുതിയ വിപുലീകരണത്തിലൂടെ ലക്ഷക്കണക്കിന് ചെറുകിട വ്യാപാരികളെ കൂടുതൽ ശക്തമായി ഔപചാരിക സാമ്പത്തിക സംവിധാനത്തിന്റെ ഭാഗമാക്കാനും ഫോൺപേ ലക്ഷ്യമിടുന്നു. ഡിജിറ്റൽ ഇടപാടുകൾ സജീവമായി നടത്തുന്ന കെവൈസി പൂർത്തിയാക്കിയ വ്യാപാരി ശൃംഖലയിലൂടെ അവരുടെ ബിസിനസ് പ്രവർത്തനങ്ങൾക്ക് കൂടുതൽ വ്യക്തത ലഭിക്കുമെന്നും കമ്പനി പറയുന്നു. ഇതുവഴി വായ്പാ സ്ഥാപനങ്ങൾ നൽകുന്ന വായ്പകൾ ഉൾപ്പെടെ കൂടുതൽ ഔപചാരിക സാമ്പത്തിക സേവനങ്ങൾ ലഭ്യമാക്കുന്നതിനുള്ള സാധ്യതയും ചെറുകിട വ്യാപാരികൾക്ക് വർധിക്കുമെന്നാണ് ഫോൺപേയുടെ വിലയിരുത്തൽ.