ലോറൻസ് ബിഷ്ണോയ് ഗ്രൂപ്പിന്റെ നിർദേശത്തിലാണ് സിനഗോഗിന് തീയിട്ടതെന്ന സംശയം അന്വേഷണ സംഘം ഗൗരവത്തോടെയാണ് കാണുന്നത്. അതിനാൽ തന്നെ എബിൻ പോളിന് നിർദേശം ലഭിച്ച ടെലിഗ്രാം അക്കൗണ്ട് ലോറൻസ് ബിഷ്ണോയ് ഗ്രൂപ്പിന്റേതാണോ എന്ന് ഉറപ്പിക്കാനുള്ള അന്വേഷണമാണ് ആദ്യഘട്ടത്തിൽ നടക്കുന്നത്. കേസ് അന്വേഷണം കേന്ദ്ര ഏജൻസികൾക്ക് കൈമാറാനുള്ള പ്രധാന കാരണങ്ങളിലൊന്നും രാജ്യാന്തര ക്വട്ടേഷൻ സംഘത്തിന്റെ ഇടപെടലാണ്.

എബിൻ പോളിന്റെ മൊബൈൽ ഫോൺ അടക്കമുള്ള ഉപകരണങ്ങൾ പരിശോധിച്ചതിൽ നിന്നാണ് നിർണായക വിവരങ്ങൾ പൊലീസിന് ലഭിച്ചത്. ഇത്തരത്തിൽ നിരവധി സംഘങ്ങളുടെ ടെലിഗ്രാം അക്കൗണ്ടിൽ എബിൻ പോൾ അംഗമാണ്. ടെലിഗ്രാം ചാറ്റ് ഹിസ്റ്ററി പരിശോധിച്ചതിൽ തീയിടലിനു മുൻപുള്ള പ്രവർത്തനങ്ങൾ പൊലീസ് കണ്ടെത്തി. ഗ്രൂപ്പിൽ അംഗമായ എബിനോട് ഇത്തരം ഒരു ജോലിയുണ്ട് ചെയ്യാൻ കഴിയുമോ എന്നു ബോസ് ചാറ്റ് മുഖേന ചോദിച്ചു. തുടർന്നാണ് മുവാറ്റുപുഴ വാളകത്തെ വീട്ടിലും യൂസ്‌ഡ് കാർ ഷോറൂമിലും പെട്രോൾ ബോംബ് എറിഞ്ഞതും.സിനഗോഗിന് തീയിടുന്നതിന്റെ മുന്നോടിയായി പരിശീലനം നടത്തിയതെന്നാണ് കരുതുന്നത്. ഇവയുടെ ദൃശ്യങ്ങൾ പകർത്തി ബോസിന് അയച്ചു കൊടുത്തു. യൂസ്‌ഡ് കാർ ഷോറൂം തീയിടലിനു പ്രതിഫലമായി 5000 രൂപയ്ക്ക് തുല്യമായ ക്രിപ്റ്റോ കറൻസി ബോസ് അയച്ചു കൊടുത്തു.

തുടർന്നാണ് സിനഗോഗിന് തീയിടാനുള്ള നിർദേശം മറ്റൊരു ടെലിഗ്രാം അക്കൗണ്ടിൽ നിന്ന് എബിന് ലഭിച്ചത്. എന്നാൽ സിനഗോഗിനാണ് തീയിടുന്നതെന്ന് ചാറ്റിൽ നിർദേശം ഇല്ലായിരുന്നു. കൊച്ചിൻ ബ്ലോസംസ് നഴ്സ‌റി എന്നു മാത്രമാണ് തീയിടൽ നടത്തേണ്ട സ്ഥലത്തെക്കുറിച്ച് പരാമർശിച്ചിരുന്നത്. തുടർന്ന് എബിൻ തീയിട്ട ശേഷം ദൃശ്യങ്ങൾ ബോസിന് അയച്ചു കൊടുത്തു. രണ്ട് വ്യത്യസ്ത അക്കൗണ്ടുകളിൽ നിന്നാണ് ചാറ്റുകൾ നടത്തിയതെങ്കിലും രണ്ടും ബോസിന്റേതു തന്നെയാണെന്നാണ് പൊലീസിന്റെ നിഗമനം. എന്തിനാണ് ഇത്തരം ആക്രമണങ്ങൾ നടത്തിയതെന്ന് അന്വേഷണ ഉദ്യോഗസ്‌ഥരുടെ ചോദ്യത്തിന് "എനിക്ക് പണമുണ്ടാക്കണം' എന്നാണ് എബിൻ ബി. പോൾ മറുപടി നൽകിയത്. വീട്ടിൽ മുറിയിൽ അടച്ചിട്ടിരുന്നു ചെയ്യുന്നതെന്താണെന്ന് വീട്ടുകാർക്കും അറിയില്ല. എബിന് കൂട്ടുകാർ ആരും തന്നെയില്ല. മാതാപിതാക്കൾ പലപ്പോഴായി പണം നൽകുന്നതാണ് വരുമാനം. അതിനിടയിലാണ് ടെലിഗ്രാം ഗ്രൂപ്പിൽ അംഗമായതും തീയിടൽ പരമ്പര നടത്തിയതും.

അഞ്ചു ദിവസത്തെ കസ്റ്റഡി കാലാവധിക്കു ശേഷം എബിൻ ബി. പോളിനെ വീണ്ടും റിമാൻഡ് ചെയ്തു. രണ്ടു ദിവസത്തിനു ശേഷം ഇയാളെ വീണ്ടും കസ്റ്റഡിയിൽ വാങ്ങാനാണ് പൊലീസിന്റെ ആലോചന. മൂവാറ്റുപുഴയിൽ ആ ക്രമണങ്ങൾ നടത്തിയ സ്ഥലങ്ങൾക്ക് പുറമേ, പെട്രോൾ വാങ്ങിയ പുത്തൻകുരിശിലെ പമ്പ്, ലൈറ്റർ വാങ്ങിയ കട, എറണാകുളം സിനഗോഗ്, പടക്കം വാങ്ങിയ തൃപ്പൂണിത്തുറയിലെ കട എന്നിവിടങ്ങളിലും എബിനെ എത്തിച്ച് തെളിവെടുപ്പ് നടത്തി. എബിൻ സിനഗോഗിന് തീകൊളുത്തുന്നതിനുള്ള കമ്പിത്തിരി വാങ്ങിയത് 2023ലെ കളമശേരി സ്ഫോടനക്കേസിലെ പ്രതി ഡൊമിനിക് മാർട്ടിൻ സ്ഫോടനത്തിന് ഉപയോഗിച്ച ഗുണ്ടുകൾ വാങ്ങിയ അതേ കടയിൽ നിന്ന് തന്നെയായിരുന്നു.