ആലുവ ഡിവൈഎസ്പി ബൈജു എം. പൗലോസിന്റെ നേതൃത്വത്തിലുള്ള പ്രത്യേക അന്വേഷണ സംഘമാണ് കേസ് അന്വേഷിക്കുന്നത്. കസ്റ്റഡിയിലെടുത്ത പ്രതികളെ പെരുമ്പാവൂർ പൊലീസ് സ്റ്റേഷനിൽ എത്തിച്ച് വിരലടയാള പരിശോധന ഉൾപ്പെടെയുള്ള നടപടികൾ പുരോഗമിക്കുകയാണ്. അപകടമുണ്ടാക്കിയ ആഡംബര കാറിലെ 'ഇവൻറ് ഡാറ്റാ റെക്കോർഡർ' (Event Data Recorder) സാങ്കേതിക വിദഗ്ധരുടെ സഹായത്തോടെ പൊലീസ് ഇതിനോടകം പരിശോധിച്ചുകഴിഞ്ഞു. കാറിന്റെ വേഗതയും സഞ്ചരിച്ച പാതയും സംബന്ധിച്ച നിർണായക വിവരങ്ങൾ ഇതിലൂടെ ലഭിച്ചിട്ടുണ്ടെന്നാണ് സൂചന.

അപകടം നടന്ന സ്ഥലം, പ്രതികൾ മദ്യപിക്കാൻ എത്തിയ ബാറുകൾ എന്നിവിടങ്ങളിൽ എത്തിച്ച് തെളിവെടുപ്പ് നടത്തുന്നതിനോടൊപ്പം പ്രതികളെ ഒരുമിച്ചിരുത്തി ചോദ്യം ചെയ്യാനുമാണ് അന്വേഷണ സംഘത്തിന്റെ തീരുമാനം. മരിച്ചവരുമായി പ്രതികൾക്ക് മുൻകാല ബന്ധങ്ങളോ മറ്റ് ഗൂഢാലോചനകളോ ഉണ്ടോയെന്നടക്കമുള്ള എല്ലാ വശങ്ങളും പരിശോധിച്ചുവരികയാണെന്ന് പൊലീസ് അറിയിച്ചു. നാളെ വൈകിട്ട് കസ്റ്റഡി കാലാവധി അവസാനിക്കുന്നതോടെ പ്രതികളെ വീണ്ടും കോടതിയിൽ ഹാജരാക്കും.